ACCORDION ALPE ADRIA APS

Art. 1 – Denominazion, senta, regneda

1. Con chest at vegnel metù su, aldò dl Codesc Zivil y dl Decret Legislatif dai 3.7.2017/117, y dles leges regionales en doura, la lia musicala y culturala de promozion soziala denomineda “Accordion Alpe Adria APS”.

2. La lia “Accordion Alpe Adria APS”, dita da chilò inant tla forma scurteda “lia”, à sia senta legala tla fraz. Dughe, n. 14, 33040 Stregne (Talia).

3. La lia à regneda ilimiteda en relazion con la perpetuazion di fins soziai.

4. Ala é governeda da chest statut, ispiré a prinzips de democrazia y valivanza di derc de duc i comembri y da les normes de leges sun l argoment che é en doura.

5. L tramudament dla senta che aessa da ester dlaite dal medemo comun ne vel nia sciche mudament statutar y pò vegnì deliberé dal consei diretif.

Art. 2 – Finalités

1. La lia ne à degun fin de davagn, ala é apolitica, apartitica y nia confescionala y ti va do a finalités ziviches, solidaristiches y de utl sozial.

2. La vijion dla lia é chela de fé cresce la identité musicala tradizionala y storica dles comunités locales dl raion Alpe Adria per la dé inant a les generazions nueves sciche valor cultural inovatif y trasversal.

3. L obietif general dla lia é chel de valorisé la mujiga popolara dles comunités linguistiches storiches dl raion Alpe Adria; per arjonje chest tant se tolela dant de:

   • favorì les relazions anter les comunités linguistiches, les persones, i enc publics y privac, profit y no-profit;

   • fé plu saurì l azes a la conescenza dla mujiga popolara tradizionala, en particolar ti confronc dles generazions joenes;

   • slarié fora l repertore musical storich y tradizional tres i tesć scric, i spartic musicai, i video y l audio.